An enger parlamentarescher Fro un de Justizminister wëll de Fernand Kartheiser gewuer ginn, wat konkret d’Regierung fir d’Lëtzebuerger Sprooch mécht. D’Kloen am Land, datt Geriichtsurteeler an engem ganz schwéiere Franséisch sinn, hun den ADR-Deputéierten dozou bruecht, dës Fro ze stellen. D’Gesetz iwwer d’Nationalsprooch géing nämlech duerchaus d’Méiglechkeet loossen, esou Urteeler och op Lëtzebuergesch an op Däitsch erauszeginn. D’Fro ass, op dat viru Geriicht praktizéiert gëtt a wien an deem Fall d’Käschte vun enger Iwwersetzung ze droen hätt.