Den Tram schaaft Problemer, ouni der ze léisen

print

De Roy Reding huet an der Chamber, den 23. Mäerz,  nach eemol Stellung zum Tram geholl. D’ADR war ëmmer géint dee Bing-Projet, dee méi wéi eng Milliard Euro kascht, a keng Verkéiersproblemer wäert léisen. Hei als klenge Rappel, e Flyer vun eiser Partei iwwer de City-Tunnel.

De Roy Reding huet erkläert, datt de Schantgen vum Tram bis no de Gemengewalen net vill Leit géing betreffen, awer datt d’Problemer um Kierchbierg a ronderëm elo scho ganz reell wären. Hien huet nach eemol rappeléiert, datt de City-Tunnel (Zuchsgleiser ënnert der Stad) déi besser Solutioun gewiescht wären, grad och well dee Schantgen net mattsen an der Stad gewiescht wär. Well elo scho Leit dervu fuebelen, den Tram bis op eis Grenze vum Land auszebauen, huet den ADR-Deputéierte gemengt, dat wäre genee déi Zuchsverbindungen, déi de City-Tunnel direkt erméiglecht hätt. Schwätze konnt den ADR-Deputéierte nëmmen, nodeems de Chamberspresident d’Majoritéit gebieden hat, sech esou ze behuelen, wéi Deputéierte sech an enger Demokratie behuele missten … ouni vum Chamberspresident drun erënnert ze ginn.