D’Schlass Buschland zu Réimech ass vu groussem kulturhistoreschem Wäert. Aktuell steet et awer eidel. D’Alexandra Schoos wëll wëssen, wéi et mat deem ongewéinleche Schlass weidergeet.
Fro:
Laut engem Artikel am Tageblatt („CHÂTEAU ARABIA − Im verborgenen Schloss in Remich residierte zuletzt ein Scheich – jetzt zerfällt es“) befënnt sech dat sougenannt “Schlass Buschland”, och als „Château Arabia“ bekannt, tëscht Réimech a Stadbriedemes geleeën, an engem desolaten Zoustand. D’Gebai, dat 1889 gebaut gouf an architektonesch Elementer vun der Neogotik an der Neorenaissance vereent, weist e gewësse kulturhistoreschen an architektonesche Wäert op.
Dem Artikel no ass d’Schlass säit Joren Zilscheif vu Vandalismus: Fënster ginn ageschloen, bannendra si vill Deeler vun der Ausstattung zerstéiert ginn. Den Artikel weist och drop hin, dass d’Gebai a Privatbesëtz ass a bis elo net ënner Denkmalschutz steet. Vertrieder vun der Gemeng Réimech hätten den Här Kulturminister schonns gefrot, ob de Staat d’Gebai kafen a renovéiere kéint, fir et ze erhalen. Am Artikel heescht et dozou: “Eine Antwort? Bisher offensichtlich nicht.“
Virun dësem Hannergrond wéilt ech dem Här Kulturminister gär follgend Froe stellen:
- Ass dem Kulturministère den aktuellen Zoustand vum Schlass Buschland zu Réimech bekannt?
- Gouf d’Gebai schonns duerch déi zoustänneg staatlech Instanzen, besonnesch den “Institut national pour le patrimoine architectural” (INPA), am Hibléck op säi kulturhistoreschen oder architektonesche Wäert evaluéiert?
- Aus wéi enge Grënn steet d’Schlass aktuell net ënner Denkmalschutz bzw. aus wéi enge Grënn gouf et bis elo net an den nationalen Inventaire vum architektoneschen Ierwen opgeholl?
- Préift de Kulturministère aktuell en eventuellt Ënner-Denkmalschutz-Stelle vum Gebai oder aner Moossnamen zum Schutz vun dësem Schlass?
- Wéi eng rechtlech a finanziell Méiglechkeete besti fir de Staat, fir a Fäll wéi dësem dréngend Sécherungs- oder Astandhalungsmoossnamen anzeleeden, och dann, wa sech d’Gebai a Privatbesëtz befënnt?
- Goufe säitens dem Ministère Gespréicher mat der Gemeng Réimech oder aneren Acteure gefouert, fir eng Léisung fir d’Zukunft vun dësem Gebai ze fannen?
Foto Copyright: https://www.industrie.lu/Remich.html