4.600 Plaze sollen eleng 2024 am Bausecteur verschwonne sinn. D’Regierung beschwichtegt a geet dovun aus, datt déi puer Steiererliichterungen, déi viru kuerzem ausgelaf sinn, duer ginn, fir de Marché ze relancéieren. D’Lexy Schoos hëllt dat net hin a verlaangt weider Zuele vun der Regierung fir sech en eegent Bild ze maachen:
Här President,
esou wéi d’Chambersreglement et virgesäit, bieden ech Iech, dës parlamentaresch Fro un den Här Logementsminister weiderzeleeden.
Den 18. August sot de Paul Nathan, Vizepresident vun der Handwierkerkummer op der Antenn vun RTL aus, datt 2024 ronn 4600 Aarbechtsplazen am Bau verschwonne wieren, well d’Entreprisen d’Leit net méi beschäftege konnten. Duerch d’Erfarungen aus dem HORESCA-Beräich wärend der COVID-Krise wësse mir, datt et ka ganz schwiereg ginn, Plazen déi an engem Secteur ofgebaut ginn, spéider nei ze besetzen, wann d’Situatioun sech nees bessert. Am Bausecteur kënnt nach dobäi, datt mir hei ganz staark op auslännesch Mataarbechter ugewise sinn.
An deem Zesummenhang géif ech dem Här Logementsminister gär dës Froe stellen:
- Wéi vill Notairesakte si vun 2020 bis 2024 fir de Verkaf vu bestoende Logementer ënnerschriwwe ginn? Verfüügt d’Regierung schonn iwwert entspriechend Zuele fir déi éischt Hallschent 2025?
- Wéi vill Notairesakte si vun 2020 bis 2024 am VEFA-Beräich ënnerschriwwe ginn? Verfüügt d’Regierung schonn iwwert entspriechend Zuele fir déi éischt Hallschent 2025?
- Wéi vill Baugeneemegunge sinn 2020 bis 2024 jeeweils vu Privatleit fir den Eegebedarf respektiv fir ze investéieren, a wéi vill vu Betriber gestallt ginn? Wéi vill goufen der all Kéiers accordéiert? Verfüügt d’Regierung schonn iwwert entspriechend Zuele fir déi éischt Hallschent 2025?
- Wéi vill Leit schaffen aktuell nach insgesamt am Bausecteur, verdeelt op wéi vill Betriber? Kann d’Regierung d’Zuel vun de Faillitten, souwéi den Neigrënnunge vun de Betriber am Bausecteur wärend de Joren 2020 – 2024 presentéieren a jeeweils no Kleng-, Mëttel a Groussbetriber differenzéieren? Verfüügt d’Regierung schonn iwwert entspriechend Zuele fir déi éischt Hallschent 2025?