Iwwer 1.300 Leit wollte vum Lëtzebuerger Terrain aus illegal an Däitschland areesen, ëmmerhin 869 goufen an de Grand-Duché zeréckgewisen. Wéi geet et duerno mat hinne weider? Wéi ee Land ass fir se zoustänneg? Falls si sech duerno, wouméiglech zwangsleefeg, zu Lëtzebuerg ophalen, dann ënnert wéi engem Statut? Eng parlamentaresch Fro vum Fred Keup:
Här President,
esou wéi d’Chambersreglement et virgesäit, bieden ech Iech, dës parlamentaresch Fro un den Här Banneminister weiderzeleeden.
Esou wéi et an engem Onlineartikel vun der däitscher Zeitung “Die Welt” ze liesen ass, huet déi däitsch Bundespolizei am Kader vun de Grenzkontrollen 869 Leit déi wollten illegal an eist Nopeschland areesen, op Lëtzebuerger Terrain zeréckverwisen. An der Äntwert op meng parlamentaresch Fro Nummer 1214 zu deem selwechten Thema hat den Här Minister ë.a. dat hei geschriwwen: “An deene Fäll, wou d‘Police Kenntnës vun enger Rückführung huet, deelen déi däitsch Kolleegen d’Identitéit an d’Ursprungsland vun der betraffener Persoun matt”.
An deem Zesummenhang géif ech dem Här Banneminister gär dës Froe stellen:
- Huet déi däitsch Police eisen nationalen Autoritéiten d’Identitéit an d’Ursprongsland vun deenen 869 Persoune matgedeelt? Falls nee, gesäit de Minister dann eng Demande un déi däitsch Regierung vir, fir déi entspriechend Informatiounen nodréiglech zougestallt ze kréien?
- Wéi vill vun deenen 869 Persounen halen sech aktuell weider zu Lëtzebuerg op an ënnert wéi engem Statut?