D’Regierung gëtt massiv Suen aus, fir d’Elektromobilitéit ze promouvéieren an eng entspriechend nei Infrastruktur opzebauen. Dobäi ass déi längst do an esou guer privat finanzéiert, mee fir Autoe mat Verbrennungsmotor. Wéi vill kascht d’Elektromobilitéit d’Allgemengheet a wéi vill leeën d’Proprietäre vun Autoe mat Verbrennungsmotor bäi? Den Tom Weidig freet no:
Här President,
esou wéi d’Chambersreglement et virgesäit, bieden ech Iech, dës parlamentaresch Fro un den Här Finanzminister an den Här Wirtschaftsminister weiderzeleeden.
Déi lescht Regierung huet eng Rei finanziell an administrativ Ureizer geschaf, fir d’Lëtzebuerger Bierger a Firmen am Beräich vun der Mobilitéit dozou ze beweegen, vum Verbrennungsmotor op den Elektroauto ëmzeklammen. Dat bedeit fir de Staat eng Rei Käschten, ënner anerem direkt Käschte wéi Subsiden, Steiervergënschtegungen an den Ausbau vun der Infrastruktur, mee och indirekter wéi e Verloscht vun Taxen op de Verkaf vu Bensinn an Diesel mee och de Subsid fir de Stroumpräis niddreg ze halen.
An deem Zesummenhang géif ech d’Regierung gäre froe matzedeelen:
- Wéi vill e privaten Elektroauto de Staat duerchschnëttlech kascht?
- Wéi vill en elektresche Firmewon de Staat duerchschnëttlech kascht?
- Wéi vill de Staat duerchschnëttlech duerch d’Steieren op engem privaten Elektroauto erakritt an a wéi enge Beräicher déi Recetten ufalen?
- Wéi vill de Staat duerchschnëttlech duerch d’Steieren op engem elektresche Firmewon erakritt an a wéi enge Beräicher déi Recetten ufalen?
- Wéi vill de Staat duerchschnëttlech duerch d’Steieren op engem privaten Auto mat Verbrennungsmotor erakritt an a wéi enge Beräicher déi Recetten ufalen?