D’Regierung hätt eng “verdammte Flicht”, esou de Xavier Bettel beim Regierungsuntrëtt am Joer 2013, de Staatsdefizit vun 1 Milliard Euro erëm ze redresséiere fir net déi zukünfteg Generatiounen ze belaaschten. D’Regierungsféierung vu Gambia geet a manner wéi engem Joer hirem Ënn zou an et bleift bei engem Defizit vun – 1 Milliard!
Eng vu villen Inkohärenzen, déi de Gast Gibéryen a senger Interventioun vum 13. Dezember iwwert de Staatsbudget vun 2018 zur Sprooch bréngt. Den ADR-Deputéierte schwätz gewinnt däitlech a mat fundéierte Beispiller Entwécklungen un, déi op eist Land duerkommen, déi méi wéi bedenklech sinn. Wa Lëtzebuerg seng aktuell, op den onbedéngte Wuesstem opgebaute Politik weiderféiert, ginn déi zukünfteg Generatioune mat onléisbare Problemer konfrontéiert.
2040 sinn d’Pensiounsreserven opgebraucht, 2060 mussen duebel esou vill Léit wéi haut zu Lëtzebuerg schaffe fir de Renten- a Sozialsystem nach weider kënnen ze finanzéieren. Dëst, obwuel d’Regierung sech haut schonns agesteet, datt mer a Punkto Mobilitéit a Logement kuerz virum Kollaps stinn.
Am Hibléck op dës Entwécklungen entzitt sech d’Regierung léiwer hirer Verantwortung a bedreift Aewëscherei, ewéi d’Problemer vum Land konkret unzeschwätzen. Beispill Zukunftsfong: D’Regierung geet honnerte vu Milliounen Euro duerch Emprunte léinen, fir datt eis Kanner an Zukunft Reserven op der Säit hunn. Mat deenen honnerte vu Milliounen Euro kënnen se dann d’Emprunten zréckbezuelen. Eng absurd Iwwerleeung!
Eist Land steiert op geféierlech Entwécklungen zou an et schéngt, wéi wann d’Regierung de Kapp an de Sand stécht!
Highlights vum Gast Gibéryen senger Ried iwwert de Budget 2018:
- De Gast Gibéryen schwätzt iwwert d’Pensiounen an ass sech sécher: D’Lëtzebuerger si keng Egoisten! (Extrait 2’48”).
- Wéi steet et ëm déi finanziell Situatioun vu Lëtzebuerg? (Extrait 6’30”).
- De Gast Gibéryen iwwert déi Gréng (Extrait 6’18”).
- De Gast Gibéryen iwwert kleng a mettelstänneg Betriber an de neie Sozialismus zu Lëtzebuerg (Extrait 3’29”).
- De Gast Gibéryen iwwert de stramme Wuesstem an d’Kompetenz vun eiser Regierung (Extrait 5’40”).
- Budget 2018: Dem Gast Gibéryen seng integral Ried (Video 49’30”).