D’Gesetz schreift vir, datt an de Crèchen (nieft Franséisch) Lëtzebuergesch geschwat soll ginn. Mee tëscht Gesetz a Realitéit besteet oft en Ënnerscheed. Dofir huet de Fred Keup e puer Froen un d’Regierung.
Fro:
Am Gesetz vum 29. August 2017 iwwert d’Kannerbetreiung ass festgehalen, wéi eng Konditiounen eng Crèche erfëlle muss, fir vun de Bonge fir ausserschoulesch Kannerbetreiung (chèque-service accueil) kënnen ze profitéieren. Des Konditioune sinn ënnert anerem:
- datt an enger Crèche op d‘mannst eng Persoun am erzéieresche Beräich schaffe muss, déi den Niveau C1 am Lëtzebuergesche virweise kann;
- datt eng Offer fir 40 Stonne Lëtzebuergesch pro Woch virgesinn ass;
- datt d’Lëtzebuerger Sprooch an den alldeeglechen an „usuellen“ Aktivitéite vun der Crèche benotzt gëtt.
A leschter Zäit ass eis awer (erëm) zu Ouere komm, datt a verschiddene Crèchë keen oder kaum Lëtzebuergesch geschwat gëtt.
An deem Kontext hunn ech follgend Froen un den Här Minister:
- Kann den Här Minister confirméieren, datt a verschiddene Crèchë vum Land nach ëmmer keen oder kaum Lëtzebuergesch geschwat gëtt? Wa jo, leien Zuele vir, déi beleeën, a wéi ville Crèchë Lëtzebuergesch an deem Mooss benotzt gëtt, wéi et vum mentionéierte Gesetz virgeschriwwen ass?
- Wéi vill Persoune schaffen am Ganzen an der Kannerbetreiung an alle Crèchen, déi vum System vun de Bonge fir ausserschoulesch Kannerbetreiung (chèque-service accueil) profitéieren? Wéi vill vun deenen hunn op d‘mannst den Niveau C1 am Lëtzebuergeschen?
- Ass et nach ëmmer esou, wéi den Här Minister a senger Äntwert vum 12. Januar 2021 op meng parl. Fro Nr. 3300 confirméiert hat, datt de Ministère keng prezis Donnéeën doriwwer huet, ob déi Kanner, déi mat der Crèche fäerdeg sinn an an de Precoce wiesselen a vun doheem aus kee Lëtzebuergesch schwätzen, eis Nationalsprooch an de Crèchen op d’mannst usazweis geléiert hunn? Wa jo, ass geplangt, an Zukunft ze testen, ob d’Kanner no der Crèche, wann se an de Precoce ginn, Lëtzebuergesch kënnen?
- Wéi vill Kontrolle betreffend dat korrekt Benotze vum Lëtzebuergesche goufen an de Crèchen an de Joren 2021 bis 2025 gemaach? Si bei dëse Kontrolle Verstéiss géint d’Gesetz festgestallt ginn? Wa jo, wéi vill an a wéi ville Crèchen? Wat fir Moossnamen huet de Ministère an deene Fäll ergraff?
- Plangt d’Regierung Gesetzesännerungen oder aner Initiativen, fir sécherzestellen, datt d’Lëtzebuergesch-Flicht an de Crèchen an Zukunft och wierklech agehale gëtt?