Zum Ausschloss vu Lëtzebuerger Medezinstudente vum 2. Joer op der Sorbonne hunn d’Alexandra Schoos an den Tom Weidig eng Rei Froen un d’Regierung.
Fro:
Am Kontext vun der Decisioun vun der Sorbonne, fir d’Studiejoer 2025/2026 keng Lëtzebuerger Medezinstudenten zouzeloossen, huet d’Madamm Minister de 25. Juli 2025 an hirer Äntwert op d’parl. Fro Nr. 2610 vum honorabelen Deputéierte Laurent Mosar geschriwwen: « Sorbonne Université est une des quatre universités partenaires françaises dans le cadre du Protocole relatif à la coopération scientifique et universitaire susmentionné. Ce protocole reste en vigueur, mais Sorbonne Université a récemment annoncé à l’Université du Luxembourg qu’elle ne sera pas en mesure d’accepter d’étudiants en 2e année d’études médicales pour l’année académique 2025-2026. Les étudiants issus de la première année de médecine à l’Université du Luxembourg et souhaitant poursuivre leurs études en France ont dès lors dû être répartis sur les trois autres universités d’accueil françaises. Ceci est regrettable, au vu de la coopération de longue date dans le domaine des études médicales, et je compte en effet discuter de cette coopération avec Sorbonne Université. »
An deem Zesummenhang géife mir der Madamm Minister gär follgend Froe stellen:
- Wéi eng konkret Grënn huet d’Sorbonne uginn, fir keng Lëtzebuerger Studente fir d’Studiejoer 2025/2026 am zweete Joer vum Medezinstudium opzehuelen?
- Säit wéini war de Ministère iwwer dës Entscheedung informéiert?
- Firwat gouf dës Entscheedung net éischter bekannt gemaach, fir déi betraffe Studenten drop virzebereeden?
- Gouf et virun dëser Entscheedung en Dialog oder e Verhandlungsversuch mat der Sorbonne?
- Wéi vill Studente si konkret vun dëser Ännerung fir d’Studiejoer 2025-2026 betraff?
- Wéi gouf d’Ëmverdeelung vun de Studenten op déi dräi aner Partneruniversitéiten organiséiert? Gouf et bestëmmt Krittären?
- Gëtt et an der Konventioun tëscht dem Lëtzebuerger an dem franséische Staat eng Klausel, déi et enger Partneruniversitéit erlaabt, sech eesäiteg aus enger Verflichtung, wéi der Zouloossung zum zweete Studiejoer, zréckzezéien?
- Plangt d’Madamm Minister am Hibléck op déi aktuell Situatioun en Iwwerschaffe vun der Konventioun mat hirem franséischen Homolog?
- Ass déi aktuell Situatioun net en Argument dofir, d’Entwécklung vun enger vollstänneger medezinescher Ausbildung op Lëtzebuerger Territoire virunzedreiwen, fir d’Ofhängegkeet vun auslänneschen Universitéiten zu verréngeren?
- Ginn zousätzlech Alternativen ausserhalb vu Frankräich gepréift, fir Lëtzebuerger Studente méi Optiounen zu bidden?
- Geet d’Madamm Minister dervun aus, dass aner franséisch Partneruniversitéiten dem Beispill vun der Sorbonne noäifere kéinten?
- Wéi eng Rechtsmëttel stinn de Lëtzebuerger Studenten zur Verfügung, wann hir Zouloossung opgrond vun eesäitegen Entscheedunge vu Partneruniversitéiten oder vun der franséischer Regierung a Gefor geréit?
- Ginn et schonn Informatiounen doriwwer, ob d’Sorbonne fir d’Studiejoer 2026-2027 erëm Lëtzebuerger Studenten am zweete Joer vum Medezinstudium ophuele wäert?
Äntwert:
1) Wéi eng konkret Grënn huet d’Sorbonne uginn, fir keng Lëtzebuerger Studente fir d’Studiejoer 2025/2026 am zweete Joer vum Medezinstudium opzehuelen?
Dem Ministère fir Fuerschung an Héichschoul läit keng offiziell Begrënnung vir.
2) Säit wéini war de Ministère iwwer dës Entscheedung informéiert?
De Ministère gouf den 28. Juni 2025 heiriwwer informéiert.
3) Firwat gouf dës Entscheedung net éischter bekannt gemaach, fir déi betraffe Studenten drop virzebereeden?
D’Studenten am éischte Joer Medezin op der Universitéit Lëtzebuerg hunn den 2. Juli 2025 missten hire Choix maachen, op wéi enger Universitéit si fir hiertzweet Joer wéilte weiderstudéieren. Zu deem Zäitpunkt, also kuerz nodeems d’Decisioun vun der Sorbonne matgedeelt gouf, ware si doriwwer informéiert, dass op der Sorbonne fir d’akademescht Joer 2025-2026 keng Plazen am zweete Joer kéinten ugebuede ginn.
4) Gouf et virun dëser Entscheedung en Dialog oder e Verhandlungsversuch mat der Sorbonne?
Wéi aus den Erklärungen uewendriwwer ervirgeet, gouf dës Decisioun e puer Deeg virum Delai fir de Choix vun de Studente bekannt. D’Prioritéit vun der Universitéit Lëtzebuerg war et dee Moment, a Kommunikatioun mat de verschiddene franséische Partneruniversitéite sécherzestellen, dass déi 28 Studenten, déi wollten fir hiert zweet Joer Medezin a Frankräich wiesselen, eng Plaz op enger vun deenen dräi anere Partneruniversitéite géife kréien. Dëst ass och gelongen.
5) Wéi vill Studente si konkret vun dëser Ännerung fir d’Studiejoer 2025-2026 betraff?
D’Sorbonne huet an der Vergaangenheet maximal 10 Studente vun der Universitéit Lëtzebuerg pro Joer an d‘zweet Joer Medezin opgeholl. Wéi vill Studenten dëst Joer wëlles haten d’Sorbonne ze wielen, ass dem Ministère net bekannt.
6) Wéi gouf d’Ëmverdeelung vun de Studenten op déi dräi aner Partneruniversitéiten organiséiert?
Gouf et bestëmmt Krittären?
D’Studenten haten de Choix no rang utile tëscht de verschiddene Partneruniversitéiten an der Limitt vun den disponibele Plazen.
7) Gëtt et an der Konventioun tëscht dem Lëtzebuerger an dem franséische Staat eng Klausel, déi et enger Partneruniversitéit erlaabt, sech eesäiteg aus enger Verflichtung, wéi der Zouloossung zum zweete Studiejoer, zréckzezéien?
De Protocole relatif à la coopération scientifique et universitaire mat Frankräich gesäit 34 Plazen am zweete Joer Medezinstudien a Frankräich fir Studenten, déi dat éischt Joer Medezin op der Universitéit Lëtzebuerg gemaach hunn, an zousätzlech 25 Plazen am véierte Joer Medezinstudien a Frankräich fir Studenten, déi de Bachelor an der Medezin op der Universitéit Lëtzebuerg ofgeschloss hu, vir. D’Verdeelung vun de Medezinstudenten op déi verschidde Partneruniversitéite gëtt vun de véier Universitéiten zesumme mat der Universitéit Lëtzebuerg decidéiert.
8) Plangt d’Madamm Minister am Hibléck op déi aktuell Situatioun en Iwwerschaffe vun der Konventioun mat hirem franséischen Homolog?
Am Hierscht ass eng Reunioun tëscht der Universitéit Lëtzebuerg an all de franséische Partneruniversitéite geplangt fir iwwert d’Verdeelung vun de Plazen fir d’akademescht Joer 2026-2027 ze schwätzen an hei fréizäiteg Kloerheet ze hunn. Ech selwer plangen och e Gespréich mat der Sorbonne.
9) Ass déi aktuell Situatioun net en Argument dofir, d’Entwécklung vun enger vollstänneger medezinescher Ausbildung op Lëtzebuerger Territoire virunzedreiwen, fir d’Ofhängegkeet vun auslänneschen Universitéiten zu verréngeren?
D’Regierung wäert, esou wéi et am Regierungsprogramm virgesinn ass, weiderhin den Ausbau vun de Medezins- a Gesondheetsformatiounen op der Universitéit Lëtzebuerg ënnerstëtzen. De Bachelor an der Medezin gouf viru Kuerzem evaluéiert an d’Resultater vun dëser Evaluatioun wäerten am Hierscht virgestallt ginn. Parallel funktionéiert zanter ugangs dëses Joers en Aarbechtsgrupp, dee soll kucken, wat gebraucht gëtt fir an Zukunft e Master op der Universitéit Lëtzebuerg kënnen unzebidden. Wichteg Punkte sinn hei Personal, Infrastrukturen a Budget, awer och d’Fro, wat eventuell Konsequenze wieren op d’Studieplazen an der Medezin, déi mir an den Nopeschlänner hunn. Op Basis vum Rapport vun dësem Aarbechtsgrupp wäert d’Regierung zesumme mat der Universitéit Lëtzebuerg an den Acteuren aus dem Gesondheetssecteur eng Decisioun huelen. Et ass mäi Wonsch, dass mir e Master-Programm op der Universitéit Lëtzebuerg kréien, mee et ass wichteg, dass och d’Qualitéit vun dëser Formatioun stëmmt an näischt iwwert de Knéi gebrach gëtt. D’Zesummenaarbecht mat onsen Nopeschlänner bleift awer och weiderhin wichteg.
10) Ginn zousätzlech Alternativen ausserhalb vu Frankräich gepréift, fir Lëtzebuerger Studente méi Optiounen zu bidden?
Nieft dem Protocole mat Frankräich, gëtt et och en Accord mat der Fédération Wallonie-Bruxelles, dee 15 Plazen am zweete Joer Medezin an 8 Plazen am véierte Joer Medezin op Universitéiten vun der franséischsproocheger Communautéit vun der Belsch virgesäit. D’Universitéit Lëtzebuerg huet ausserdeem Accorde mat den Universitéite vu München, Erlangen-Nürnberg a Würzburg fir jeeweils eng Plaz am zweete Joer Medezin. Gespréicher hunn och mat aneren däitsche Länner a mat Schwäizer Universitéite stattfonnt, dës hu sech awer bis elo net konkretiséiert.