Zum katastrophale Brandongléck an der Silvesternuecht zu Crans-Montana huet den Tom Weidig e puer Froen un den Inneminister.
Fro:
An der Silvesternuecht si bei engem tragesche Brand am „Le Constellation“-Club zu Crans-Montana no aktuellem Stand bis elo 40 Leit ëm d’Liewe komm a méi wéi honnert, deels schwéier, verletzt ginn. Videoen an Zeienaussoen deiten drop hin, datt duerch Schampeskäerzen oder aner Forme vu Pyrotechnik eng Isolatioun um Plaffong Feier gefaangen huet. Dëst Feier huet sech séier ausgebreet an et gouf nëmmen ee schmuelen Ausgang.
Natierlech muss eng Enquête déi genau Ursaache rausfannen, ier een definitiv Conclusiounen zéie kann. Mee an der Vergaangenheet si scho vergläichbar Onglécker passéiert an och ënnersicht ginn, sou z.B. an den Nuetsclibb „Lame Horse“ an der russescher Stad Perm (2009, 156 Doudesaffer), „Kiss“ an der brasilianescher Stad Santa Maria (2013, op d’mannst 242 Doudesaffer) an „Colectiv“ zu Bukarest (2015, 64 Doudesaffer). Och bei dëse Virfäll gouf et vergläichbar Musteren: Pyrotechnik, entzündbaart Material a schlecht Evakuéierungsméiglechkeeten.
An deem Kontext hunn ech follgend Froen un den Här Minister:
- Waren déi genannten Onglécker zu Perm, Santa Maria a Bukarest Géigestand vun Diskussioune bei den zoustännege Servicer vum Staat? Wa jo: Goufen doropshi konkret Moossnamen decidéiert? Wa jo: Gëtt et dozou e Rapport? Wa jo: Kann den Här Minister eis dee Rapport zoukomme loossen?
- Gëtt et zu Lëtzebuerg e Verbuet fir Schampeskäerzen? Wann nee, gëtt iwwer esou ee Verbuet nogeduecht?
- Gëtt et zu Lëtzebuerg e Verbuet vun entzündbarer Isolatioun? Wann nee, gëtt iwwer esou ee Verbuet nogeduecht?
- Huet Regierung no de Virfäll zu Perm, Santa Maria a Bukarest den Organisateuren a Bedreiwer vun Nuetsclibb an aneren Etablissementer Informatiounen zoukomme gelooss, fir de Brandrisiko ze reduzéieren?
Äntwert:
- Der Inspection du travail et des mines (ITM) sinn déi genannten Onglécker bekannt. An internen Diskussiounen iwwert Brandschutzmoossname sinn änlech Onglécker thematiséiert ginn, fir ze iwwerpréiwen ob d’Moossnamen duerginn, wéi se fir Etablissementer (z.B.: Diskoen déi eng Kapazitéit vu méi wéi 500 Persounen hunn an déi an de Kompetenzberäich vum Aarbechtsminister falen) gefuerdert ginn. Opgrond vun den Ursaachen déi an de Medie genannt goufen, sinn Analysen vun de Sécherheetsoplagen a -konditiounen, déi d’Kommodo-Geneemegung vum Aarbechtsminster festleet, gemach ginn. Dës Analysen haten zur Schlussfolgerung geféiert, datt des Oplagen a Konditiounen, wann se agehale ginn, ausräichend sinn an datt keng zousätzlech Moossname musse gehol ginn, fir esou Onglécker ze verhënneren. Aus desem Grond gouf kee weidere Rapport erstallt.
- Bei pyrotechneschen Artikele muss een zu Lëtzebuerg ënnerscheeden tëschent de pyrotechneschen Artikelen, déi fir Konsumente bestëmmt sinn (dat sinn d’Kategorien F1 a F2), an de sougenannte professionelle pyrotechneschen Artikelen (dat sinn am Prinzip d’Kategorien F3, F4, T1 an T2). D’Benotze vu pyrotechneschen Artikelen aus de Kategorien F1 an F2 ënnerläit zu Lëtzebuerg kenge speziellen Oplagen. Hei gëllen am Prinzip d’Sécherheetsoplagen esou wéi vum Hiersteller uginn. D’Benotze vun professionellen pyrotechneschen Artikelen ënnerläit der sougenannter KommodoGesetzgebung, d.h. fir d’Benotze vun dësen Artikele ass eng Kommodo-Geneemegung vum Aarbechtsminister noutwenneg. An dëser Kommodo-Geneemegung ginn déi noutwenneg Sécherheetsmoossname festgeluecht. Wann dës Sécherheetsoplagen agehale ginn an d’Artikelen esou benotzt ginn, wéi et vum Hiersteller virgesinn ass, besteet am Prinzip keen direkte Risiko fir d’Sécherheet vun de Leit. Etablissementer (zum Beispill: Diskoen déi eng Kapazitéit vu méi wéi 500 Persounen hunn) falen an de Kompetenzberäich vum Aarbechtsminister an brauchen eng Exploitatiounsgeneemegung. An dëse Geneemegunge gëtt virgeschriwwen, datt all Notzung vu pyrotechneschen Artikelen (och fir d’Kategorien F1 a F2) an och vun oppene Flame bei der ITM mussen deklaréiert ginn mat enger Indikatioun vun den néidege Sécherheetsmoossnamen. Aus dësem Grond gëtt aktuell net iwwert ee Verbuet fir Schampeskäerzen nogeduecht.
- Am Kader vun der Kommodo-Gesetzgebung ginn entflambar Isolatiounen net generell verbueden. Ofhängeg vun der Aktivitéit, der Gréisst vun de Gebaier an der baulecher Situatioun ginn et ënnerschiddlech Ufuerderungen un d’Entflambarkeet vun de verschiddene Baumaterialen. Et ginn dobäi ënnerschiddlech Grade vun der Entflambarkeet, déi an enger europäescher Norm ënnert dem Begrëff «Réaction au feu» definéiert sinn. Des Ufuederungen un d’Enflambarkeet vun de Baumateriale ginn, jee no Situatioun, am Kader vun der Kommodo-Geneemegung vum Aarbechtsminister virgeschriwwen.
- No de Virfäll zu Perm, Santa Maria a Bukarest goufen et keng spezifesch Informatiounsschreiwe vun der Regierung un d’Organisateuren a Bedreiwer vun Nuetsclibb an aneren Etablissementer, déi iwwer déi bestoend gesetzlech a reglementaresch Ufuerderungen erausginn. D’Reduktioun vum Brandrisiko gëtt zu Lëtzebuerg virun allem iwwer déi am Kader vun der Kommodo- an Exploitatiounsgeneemegung festgeluechte Sécherheetsoplagen assuréiert, souwéi iwwer d’Kontrollen an d’Sensibiliséierung duerch d’ITM an déi aner zoustänneg Servicer. Nieft der berodender Missioun fir Bauhären a Buergermeeschteren, wëll de CGDIS seng Sensibilisatiounscampagne fir de Grand Public an de Public ciblé (Bedreiwer) erweideren. D’Zil ass et, an éischter Linn ze informéieren, wéi eng Brandentsteeung ka verhënnert ginn an doriwwer ewech, wéi sech allgemeng am Brandfall soll verhale ginn. Dat begräift souwuel eng eventuell Eischtbrandbekämpfung, wéi och déi sécher Evakuatioun vum Gebäi.
Foto-Copyright: Deutschlandfunk