Typ–2–Diabetes ass eng Stoffwiessel-Erkrankung, déi dozou féiert, dass de Bluttzockerspigel an d’Lut geet. D’Alexandra Schoos huet e puer Froen zur Entwécklung vun dëser Erkrankung zu Lëtzebuerg.
Fro:
Et ass allgemeng bekannt, datt de Konsum vun Zocker an eiser Gesellschaft däitlech zougeholl huet an, kombinéiert mam Manktem u kierperlecher Aktivitéit, zu enger verstäerkter Verbreedung vun iwwergewiichtege Leit an der Populatioun bäidréit. Dëst kann ënner anerem zu Diabetes féieren. Et ass awer och bekannt, dass ëmmer méi jonk an net iwwergewiichteg Fraen un Diabetes Typ 2 erkranken. Um Site vum “Observatoire national de la santé” fënnt ee Prozentzuele fir Diabetes Typ 2 fir d’Bevëlkerung tëschent 20 an 79 Joer fir den Zäitraum 2011 bis 2024.
An deem Zesummenhang hunn ech follgend Froen un d’Madamm Gesondheetsminister:
- Leien der Regierung detailléiert Zuele vir fir Diabetes Typ 2, opgeschlësselt no Jore vun 2015 bis haut, no Altersgruppen (0-10 Joer; 11-20 Joer; 21-40 Joer; 41-60 Joer; > 60 Joer) an no Geschlecht? Wann et fir eng bestëmmt Altersgrupp keng Zuele gëtt, firwat net?
- Der “Fédération internationale du Diabète” no si 26,2 % vun de Betraffenen – dat heescht ongeféier ee vu véier – hei zu Lëtzebuerg net diagnostizéiert. Wéi gedenkt d’Regierung dës Zuel a signifikanter Form ze reduzéieren?
- Wéi eng Zuelen existéieren iwwer Persounen, déi wéinst engem feelenden oder spéiden Diagnostik scho Komplikatiounen (z. B. Niereversoen, kardiovaskulär Krankheeten oder Amputatiounen) entwéckelt hunn?
- Wéi eng Moossnamen si scho geholl ginn oder wäerten nach geholl ginn, fir de Kanner an Erwuessenen eng gesond Ernärung a Liewensweis effektiv an nohalteg méi no ze bréngen? Wéi eng aner Präventiounsmoossnamen si virgesinn, fir d’Entstoe vun Diabetes Typ 2 bei de verschiddene Bevëlkerungsgruppen ze reduzéieren?