Erzéiungsrent amplaz chèque service

Am Kader vun hirer Positionéierungscampagne huet d’ADR de 7. Abrëll hiert Konzept vum Betreiungsgeld respektiv der Erzéiungsrent virgestallt. Basis vun deem Konzept ass d’Iwwerleeung, datt d’Erzéiungsaarbecht vill méi ewéi bis elo vum Staat unerkannt muss gin. Do dernieft ass d’ADR der Opfaassung, datt de Staat sech net an d’Fro anzemëschen   huet wéi eng Famill sech organiséiere wëll.

„Déi Politik déi an de leschte Joren gemaach gin ass, mëscht sech awer an“, esou den ADR-Fraktiounschef Gast Gibéryen, dat andeems de chèque service just deene Familljen zegutt kënnt déi hir Kanner an eng Betreiungsstruktur gin. „Déi Elteren awer, déi hir Kanner doheem erzéien, kréie kee chèque service a ginn an eisen Aen vum Staat behandelt ewéi de leschten Dreck.“

D’ADR plädéiert duerfir datt deen Elterendeel, deen doheem bleift fir d’Kanner z’erzéien eng staatlech Unerkennung kritt. Dofir fuerdere mir de Beruffstitel vum „Erzéienden Erwuëssënen“ an e Betreiungsgeld fir jiddereen.

An dësem Betreiungsgeld sollen all d’Familljenzoulagen déi et de Moment gëtt zesummegefaasst ginn  Fir déi sozial Komponent net ze vergiessen muss dëst Betreiungsgeld besteiert gin. Mat dësem Betreiungsgeld kënnen Elteren dann entweder eng Opfankstruktur bezuelen an déi se hir Kanner gin, oder, wann se hir Kanner doheem erzéien, kënnen se dëst Betreiungsgeld fir sech behalen, ma mussen sech obligatoresch an enger Pensiounskees weiderversécheren.

Doduercher kréien déi Leit déi doheem bleiwen fir hir Kanner z’erzéien eng eegestänneg Pensiounscarrière. Well dat an der Regel nach ëmmer d’Frae sin, kommen dës och aus dem aktuellen Ofhängegkeetsverhältnis eraus an dat se erageroden wann se ophale mat schaffen.De Gast Gibéryen sot sech iwwerzeegt, datt, nodeem d’ADR fir Rentegerechtechkeet gesuergt huet, och dës Erzéiungsrent duerchgesat ka ginn. Nëmme mam Betreiungsgeld respektiv der Erzéiungsrent kriiten d’Familljen nämlech de Choix sech esou ze organiséieren wéi se wëllen.