An der Gemengerotssëtzung vum 23. Oktober huet den Diddelenger ADR-Conseiller Marc Schiffmann zwou Froe gestallt, déi eng iwwert d’Linn 10 vum TICE, déi aner iwwert e sozio-kulturelle Projet. Duerch hir Äntwerten huet d’LSAP zum Virschäin bruecht, datt d’Sozialiste sech weder fir d’Leit, déi e Familljemember oder e Bekannte wëllen am Spidol besichen, nach fir den Dialog tëscht de verschiddene Communautéite wëll asetzen.

Déi éischt Fro, déi de Vertrieder vun der ADR un de Schäfferot gestallt huet, betrëfft den „Arrêt Hôpital“. D’Linn 10 vum TICE fiert zwar dësen Arrêt un, sonndes ass dat awer net de Fall. Dobäi handelt et sech ëm deen Dag, vun deem vill Leit profitéiere fir an d’Geriatrie op Besuch ze kommen. D’ADR huet sech an der Gemengerotssëtzung dofir agesat, datt wéinstens sonndes nomëttes, dat heescht tëschent 12.00 an 19.00 Auer, de Bus bis bei d’Spidol fiert.

D’Erklärunge vum Schäfferot beweisen, datt d’Sozialisten net kënnen eescht geholl ginn. Den TICE hätt nämlech Zielunge virgeholl, vu méindes bis samschdes, mam Resultat, datt samschdes manner Leit mat der Linn 10 fueren. Dobäi geet et dach guer net ëm samschdes, mä ëm sonndes! Datt d’Ofstëmmung mat den anere Linne vum City-Bus problematesch wier kann d’ADR-Sektioun Diddeleng och net novollzéien. D’Argument, datt d’Leit an der Woch genuch Méiglechkeeten hätten, ass eng Respektlosegkeet géigeniwwer deenejéinegen, déi aus Zäitgrënn nëmme sonndes kënnen op Besuch goen.

D’Uleies vun de Bierger ass dem Schäfferot wuel egal, an dat vun enger Partei, déi sech soss bedéngungslos fir den ëffentlechen Transport agesat huet an e souguer wollt gratis maachen. Wéi d’Zäite sech awer änneren…

Déi zweet Fro betrëfft de Projet „Ensemble – Promouvoir le dialogue interculturel“. Dës begréissenswäert Initiativ, déi vun Inter-Actions zesumme mam Familljeministère an der Gemeng Diddeleng presentéiert gëtt, offréiert ënnert anerem Coursen an der Sophrologie. Et handelt sech dobäi ëm eng intressant Technik fir de Stress am Alldag besser ze geréieren. Leider ginn dës Coursen nëmmen a franséischer Sprooch ugebueden. Eng Iwwersetzungsméiglechkeet ass net virgesinn. Domadder ass den „dialogue interculturel“ fir Lëtzebuerger, déi der franséischer Sprooch net esou mächteg sinn, oder awer de Germanophonen net zougänglech.

De Schäfferot huet erkläert, datt d’Persoun, déi d’Coursen ofhält, nëmme Franséisch schwätzt an datt eng Iwwersetzung net néideg wier. Esou gesinn d’Sozialisten zu Diddeleng den “dialogue interculturel”: eben ouni d’Lëtzebuerger Sprooch…