An der Gemengerotssëtzung vum 19. Mäerz 2012 huet de Gemengeconseiller Fernand Kartheiser dës Motioun agereecht.

De Gemengerot vun der Stad Lëtzebuerg

Consideréiert:

  • Dat de Phänomen vun der Liichtverschmotzung allgemeng zouhëlt obschonns dee grouss Nodeeler fir d’Ëmwelt huet;
  • dat d‘Gemengen a besonnesch déi méi grouss Stied sollen e Bäitrag zu der Reduktioun vun der Liichtverschmotzung leeschten, besonnesch wat d’Stroossebeliichtung ugeet;
  • dat et well eng ganz Rei vun « intelligenten » a besser orientéieren Beliichtungsméiglechkeeten gëtt, déi d’Liichtverschmotzung kënnen reduzéieren;
  • dat eng Reduzéierung vun der onnéideger oder schlecht orientéierter Beliichtung kann dozou bäidroen Energie ze spueren a Käschten anzespueren;
  • dat d’Reduzéierung vun der Beliichtung net däerf op Käschten vun der Sécherheet goen;
  • dat d’Noperschaft vum Flughafen Findel och besonnesch Sécherheetsproblemer an dem Kontext stellt, zum Beispill duerch polariséiert Liichtstrahlen, an dat déi zoustänneg Autoritéiten fir de Findel dowéinst och missten consultéiert ginn;
  • dat am Ausland schonns vill Stied a Gemengen grouss Efforten maachen fir d’Liichtverschmotzung ze reduzéieren.

Decidéiert:

  • Déi zoustänneg Déngschter vun der Gemengeverwaltung domat ze beoptragen fir bis den 1. September 2012 eng Etude ze maachen fir ze weisen wéi d’Beliichtung an der Stad kann reduzéiert ginn. a wéi e Bäitrag d’Stad Lëtzebuerg kann géint d’Liichtverschmotzung leeschten.