Här President,
Sou wéi d’Chambersreglement et virgesäit, bieden ech Iech, dës Drénglechkeetsfro Fro un den Här Premierminister an un den Här Finanzminister weiderzeleeden.
An der Nuecht vun e Méindeg op en Dënschdeg, de 27. November, huet den Eurogrupp decidéiert, Griicheland eng weider Finanzsprëtz vun 43,7 Milliarden Euro ze ginn. Ënner anere Mesurë sollen och d’Prêten u Griicheland an der Lafzäit verlängert ginn an den Zënsfouss erofgesat ginn.
Dowéinst géif ech dem Här Premierminister an dem Här Finanzminister gären dës Froe stellen:
-
Wéi héich ass de Bäitrag vu Lëtzebuerg fir dës nei Tranche vu 43,7 Milliarden, déi u Griicheland iwwerwise gëtt?
-
Wéi war déi éischt Lafzäit a wat ass déi nei Lafzäit fir de bilaterale Prêt vu Lëtzebuerg u Griicheland?
-
Wéi war den éischten Zënsfouss a wéi ass den neien Zënsfouss vun dësem Prêt ?
-
Ass et ausgeschloss, datt dëse Prêt u Griicheland vun engem Scholdeschnëtt ka betraff ginn?
Mat déiwem Respekt,
Gast Gibéryen
Député