D’Juegdsyndikater sinn ënner anerem zoustänneg, fir tëscht de Proprietären d’Pachtgelder, déi d’Jeeër bezuelen, ze verdeelen.  Dës Prozedur ass fir si mat onnéidegen Hürde verbonnen, well hinnen déi néideg Donnéeën net einfach a kamoud um elektronesche Wee zur Verfügung gestalt ginn. De Roy Reding gesäit hei Verbesserungspotential.

Medikamenter kënnen, wann se an Interaktioun wierken, geféierlech Niewewierkunge produzéieren. An deem Zesummenhang wëll de Fernand Kartheiser a senger wichteger parlamentaresch Fro wëssen, wéi d’Patientesécherheet zu all Abléck séchergestallt ka ginn!

Kierzlech huet den Deputéierte Fernand Kartheiser eng parlamentaresch Fro un de Justizminister an un den Educatiounsminister gestallt. D’Fro dréint sech ëm d’Nationalitéitegesetz, dat virgesäit, datt eng Persoun, déi zënter 20 Joer zu Lëtzebuerg wunnt, och d’Lëtzebuerger Nationalitéit ufroe kann. E Sproochentest soll hei net musse gemaach ginn. Allerdéngs si 24 Stonne Sproochecoursen als eng Konditioun am Artikel 28 vum Gesetz vum 8. Mäerz festgehalen. Den Deputéierte Fernand Kartheiser wëllt méi genau Informatiounen iwwer déi 24 Stonne Sproochecoursë kréien a freet no.

Op YouTube ass e Video am Ëmlaf, deen de Sujet “e-government” behandelt. Heifir gouf e satiresche Video mat Biller, Riedens- an Ausdrocksweis vum aktuellen amerikanesche President produzéiert. Dëse Video dréit allerdéngs de Logo vum CTIE, enger lëtzebuergescher, staatlecher Administratioun, a vermëttelt doduerch en offizielle Charakter. Aus dësem Grond huet de Fernand Kartheiser eng parlamentaresch Fro un d’Regierung gestallt. Hei hannerfreet den Deputéierten der Regierung hir Kenntnis an hiren Accord zu dësem Video, sou wéi och hir Astellung zu enger däraarteger Duerstellung duerch eng staatlech Administratioun.

D’Aktualitéit huet gewisen, datt Manifestatiounen vun auslännesche Parteien an aner Länner séier fir Onrou suerge kënnen. De Fernand Kartheiser huet eng parlamentaresch Fro gestalt, fir gewuer ze ginn, wat fir Manifestatiounen zu Lëtzebuerg kënne gemaach ginn oder ob eventuell esou Veranstaltungen vun auslännesche Politiker a Parteien hei am Land kënnen evitéiert ginn.

De Fernand Kartheiser huet eng parlamentaresch Fro gestalt iwwer dat neit Taxisgesetz. Et geet virun allem dorëm, wéi d’Taxischauffeuren iwwer d’Gesetz informéiert sinn an ob ët Problemer gëtt bei Situatiounen, wou de Client sech fräi säin Taxi kann aussichen. Och ass d’Fro, ob scho vill Kloe vu Clienten a Chauffeuren un déi zoustänneg Plaze komm sinn.

De Roy Reding huet op enger Pressekonferenz de 17. Mee ënnerstrach, datt sech d’ADR kloer géint déi vum Alex Bodry proposéiert Verfassungsännerung vum Artikel 32 Paragraph 4 ausschwätzt. Dës gesäit vir, datt d’Regierung an engem onkloer definéierten  “Ausnamezoustand” dozou ermächtegt wär, ze legiferéieren, ouni dofir iwwert de normale legislative Wee vun der Chamber mussen ze goen. Dëst mécht an den Ae vun der ADR eng Dier op a Richtung Muechtmëssbrauch an Ontransparenz.

D’parlamentaresch Ekipp vun der ADR verstäerkt

Ugangs der Pressekonferenz huet de Gast Gibéryen d’Ekipp vun de parlamentaresche Mataarbechter vun der ADR presentéiert. Roland Houtsch, an Alain Kleeblatt kréie Verstäerkung duerch d’Mandy Krier an de Michel Lemaire.

Den 11. Mee war nach e Gesetz an der Chamber, wat an der Haaptsach d'”Action locale pour Jeunes” an de Service National de la Jeunesse integréiert huet. D’ADR huet hei dergéint gestëmmt. De Fernand Kartheiser huet d’Noutwennegkeet vun deem Gesetz net agesinn, wou Déngschter zesummegeluecht ginn, déi bis elo gutt eleng fonktionéiert hunn.

Beklot huet sech de Fernand Kartheiser och iwwer d’Sprooch vum Gesetz: Et wär eng schwéier verständlech Spezialistesprooch an e Gesetz hätt lieserlech a fir all Mënsch verständlech ze sinn.

D’ADR huet sech beim Gesetzprojet iwwer d’Maison d’Orientation enthalen. Dee Service soll ee Genre Guichet unique ginn fir de Schüler ze hëllefen, sech fir eng Karriär ze décidéieren. De Fernand Kartheiser huet ënnerstrach, datt dat Gesetz eigentlech reng organisatoresch Saachen ännert. Dëst wär schwiereg, wat d’Lycées-Autonomie ugeet. Och sinn net all Méiglechkeeten am Haus vun der Orientatioun: Arméi a Cedies (Unis-Orientatioun) oder och d’Validatioun vun der Experience net do vertrueden.

Duerfir mengt de Fernand Kartheiser, datt op alle Fall misst an e puer Méint gekuckt ginn, wéi sech déi nei Organisatioun bewährt.

D’Politik war eemol net den Haaptsujet op der 30-Joer-Feier vun der ADR en Donneschdeg, 11. Mee, an der Schéiss. Et war méi eng grouss Feier vun enger Partei, déi an drësseg Joer en eenzegaartegen a komplett atypesche Parcours gemaach huet. E Parcours, deen de Parteipresident Dr Jean Schoos nach eng Kéier opgezielt huet, an enger Ried, déi dem Intresséierten e ganz gudden Iwwerbléck ginn huet iwwer d’Ufänk vun der Partei … ugefaang bei der 5/6-Beweegung fir méi e gerechte Rentesystem, mat deem alles ugefaang huet.

Och an der Press ass d’Feier vun eiser Partei aktéiert ginn. En exzellenten Interview huet RTL bruecht, wou de Gast Gibéryen den 11. Mee Invité vun der Redaktioun war.

30-joer-feier_gg_rtl

 

Am Kader vum neien Taxisgesetz huet de Fernand Kartheiser dem Minister fir Infrastruktur an nohalteg Entwécklung eng Rei Froe gestallt an zugläich konkret Proposen ervirbruecht, wéi een d’Taxiswiesen zu Lëtzebuerg méi klientsfrëndlech gestalte kann.

De Fernand Kartheiser huet kierzlech eng parlamentaresch Fro iwwert d’Benotzen vun der Busspur gestallt. Ob just Busser des Spuer benotzen däerfen oder och aner Déngschtgefierer ass a ville Fäll ondäitlech gekennzeechent. Den ADR-Deputéierte proposéiert dofir eng Rëtsch u praktesche Virschléi, wéi een d’Benotze vun der Busspur méi sënnvoll gestalten kann.

Net ëmmer ass Rapp a Klapp an der Chamber. Den 10. Mee 2017 war d’Gemengefusioun vu Mompech a Rouspert op der Dagesuerdnung. De Gast Gibéryen huet dëser Fusioun op eng charmant Art a Weis zougestëmmt. Et ass nach Plaz fir Spaass a Mënschlechkeet an der Chamber … iwwer d’Parteien eraus.

Respekt fir kleng a mëttel Betriber gefuerdert, huet de Roy Reding an enger Chambersdebatt. Dat fir d’Aarbechtsplazen, déi si schafen, d’Steieren, déi si bezuelen, all hir Leeschtungen an hir Beiträg, och beim Andreiwe vun der Lounsteier an der TVA. Des Betriber suerge mat fir de Lëtzebuerger Triple-A, duerfir, datt Lëtzebuerg international esou gutt do steet, sot de Roy Reding am Kader vun enger Interpellatioun vum Félix Eyschen (CSV).
Hien huet duerfir plädéiert, d’Suergen an d’Ängscht vun esou Entrepreneuren ze verstoen, hinnen net zevill bürokratesch Flichten opzedrummen a si sech op hir Betriber konzentréieren ze loossen. Als konkret Mesure wëll de Roy Reding, datt d’KMB nach just déi TVA zeréckbezuele sollen, déi si och kasséiert hunn. Dat géing si besser schützen, wann si Rechnungen net géinge bezuelt kréien.

Éischt Konsultatiounen fir en erweiderte Policemusee sinn ugelaf, dëse soll och fir aner Déngschter, wéi Pompjeeën a Secouristen op sinn, an op enger neier Plaz entstoen. Den aktuelle Policemusee um Verluerekascht schéingt Wunnenge Plaz maachen ze mussen.
Dat ass d’Äntwert vum Minister Etienne Schneider op eng erweidert Fro vum Fernand Kartheiser. Dem ADR-Deputéierte seng Beméiunge fir de Policemusee ze retten, déi schliisslech zu dësem parlamentareschen Akt, den 10. Mee 2017, gefouert hunn, schéngen also ze wierken. De Minister fir bannescht Sécherheet huet a senger Äntwert d’Argumenter vum Fernand Kartheiser all opgegraff a Punkt fir Punkt konfirméiert. A senger Äntwert op de Minister, wollt de Fernand Kartheiser vun der Regierung zäitlech Zousoen, datt déi Aarbechten elo séier weiderginn.

Wie vun Diddeleng aus an d’Stad fueren wëll, muss ab 2018 ëmmer zu Beetebuerg ëmklammen. Et gëtt da keng direkt Linn méi an d’Stad, well déi vu Wuermereng (F) op Lëtzebuerg ofgeschaft gëtt. De Gast Gibéryen huet den 10. Mee eng mëndlech Fro an der Chamber gestallt, wou hie fir Kloerheet suergen wollt.  Et schéngt, wei wann Diddeleng bei den Zuchverbindungen an Zukunft zweet Klass fiert an de Video-Extrait vum Transportminister schwätzt fir sech. Hie versprécht fir d’weider Zukunft awer nees Besserungen.

D’Diddelenger ADR-Sektioun hat mat engem Flyer op der Braderie leschte Weekend schonn dergéint protestéiert, datt déi direkt Verbindung vun Diddeleng an d’Stad soll verschwannen. De Vic Haas als Diddelenger Conseiller hat och d’Intiative geholl, fir dës Fro am Gemengerot op d’Dagesuerdnung setzen ze loossen.

 

Bei der Konsultatiounsdebatt iwwer d’Medie war den Här Staatsminister Xavier Bettel, a senger Funktioun als Medieminister, e bëssi iwweräifreg. Obwuel seng Wieler him schonn 2015 mam Referendum zum Auslännerwalrecht verdäitlecht hunn, wéi wichteg hinnen déi Nationalidentitéit ass – déi jo schliisslech am direkten Zesummenhang mat der Nationalsprooch steet – huet hien den 9. Mee e puer Mol behaapt, Lëtzebuerg hätt méi wéi eng Nationalsprooch (a Portugisesch misst bei den Onlinemedien als Sprooch berécksiichtegt ginn). Wéi de Fernand Kartheiser hie wollt iwwer säin Iertum, wat d’Zuel vun de Nationalsproochen ugeet, opklären, war den Här Staatsminister esou opbruecht, datt hie senger Opreegung als éischt emol mat engem franséischen Ausdrock huet musse Loft maachen. Hien huet iwwerdriwwe schaarf dorop reagéiert a seng Vue vun engem Lëtzebuerg mat villen Nationalsprooche verdeedegt. Um Schluss huet de Chamberspresident am Xavier Bettel senger Sproochenzalot musse sënneren, fir d’Situatioun vun der Lëtzebuerger Nationalsprooch ze redresséieren a kloerzestellen. Net gewosst ass, ob de Premier duerno d’Lëtzebuerger Sproochegesetzgebung richteg verstanen huet.

De Roy Reding huet an der Chamber, den 9. Mee, nei Propositioune gemaach, wat d’staatlech finanziell Hëllef un d’Press ugeet. Hien huet och eng Rëtsch Kritikpunkten un der aktueller Regelung ubruecht, déi kee Pressepluralismus schaaft, mä eng Situatioun festegt, an där net all politesch Parteie sech erëmfannen. De Status Quo vun der Pressehëllef ënnerstëtzt déi Parteien, déi Presseorganer hunn, déi hinne nostinn. Generell ass den ADR-Deputéierten net duerfir, datt privat Entreprisë mat staatleche Sue subventionéiert ginn. Et ass net normal, datt déi Sue vun all Steierzueler duerfir déngen, z.B. eng kommunistesch Zeitung ze ënnerstëtzen, där hir Partei eng absolut Minoritéit duerstellt. Den ADR-Deputéierten ass op eng Rëtsch Punkten agaang, wou d’ADR vun de Medien ignoréiert oder ongerecht behandelt ginn ass.

Konkret Propositioune vun der ADR sinn, alle Parteien an alle subventionéierten Zeitungen Raum fir hir Kommunikeeën zur Verfügung ze stellen. Indirekt Pressehëllef, wéi d’Verëffentlechung vun offiziellen Annoncen an vum Chamberbliedchen, soll ophéieren an ersat ginn duerch e Chamberbliedchen, wat un all Bierger geet, ob hien eng Zeitung abonnéiert huet oder net, an der Schafung vun engem offiziellen Annonceblat.

Wat d’Deontologie, d’Beruffsethik vun de Journalisten, ugeet, fënnt de Roy Reding, datt et genuch rechtlech Mëttele gëtt fir sech géint falsch oder ongerecht Berichterstattung zur Wier ze setzen, datt dës awer net strikt genuch applizéiert ginn.

Op de Bushaisercher mécht de Radio 100Komma7 zur Zäit Reklamm fir sech a säi Programm. Duerfir benotzt den ëffentlech-rechtleche Radio och Porträte vu Politiker aus de Reie vun der Majoritéit. Den ADR-Deputéierte Fernand Kartheiser freet de Kommunikatiounsminister Xavier Bettel, ob dat fir en ëffentlech-rechtlecht Pressorgan, wat un eng gewësse Neutralitéit gebonnen ass, akzeptabel ass.

An der Tierkei kéint e Referendum doriwwer entscheeden, ob d’Doudesstrof nees sollt agefouert ginn. De Fernand Kartheiser huet eng parlamentaresch Fro gestallt. Hie wëllt ënner anerem wëssen, ob d’Lëtzebuerger Regierung wëll hir Zoustëmmung ginn, fir datt Tierken op der tierkescher Botschaft hei am Land un deem Referendum kënnen deelhuelen.

Och an enger ganz kuerzer Interventioun kann ee vill soen. D’ADR huet sech géint en europäescht Reglement ausgeschwat, an deem et ëm d’Saisie geet. Hutt Dir eng Schold am Ausland, erlaabt dat Reglement Ärem Créancier, eng Saisie op Är Bankkonten ze maachen. Wou Dir déi hutt, kritt hien iwwer d’Lëtzebuerger Bankekontrollautoritéit CSSF matgedeelt. Dat raumt engem auslännesche Créancier méi Rechter an, wéi e Lëtzebuerger der hätt, well dee kaum ka gewuer ginn, op wat fir enger Bank Dir sidd. Fir de Roy Reding ass dat eng Aushiewelung vum Lëtzebuerger Bankgeheimnis an eng Diskriminatioun vu Lëtzebuerger.

Wat muss a wat net muss un internationale Verträg an der Chamber ratifizéiert ginn, schéngt net ëmmer kloer. Iwwerdeems de Roy Reding den ADR-Accord fir e Memorandum of Understanding mat den USA, de 27. Abrëll, bréngt, ënnersträicht hie nach eng Kéier, datt d’Regierung net iwwerall richteg läit. Bei de “Programmes indicatifs de coopération” an der Entwécklungshëllef hëlt d’Regierung zum Beispill bannend Engagementer, ouni datt d’Chamber e Wuert matzeschwätzen huet.

Déi rezent Statistiken iwwert d‘Ufroe fir den internationale Schutz weisen drop hin, datt nach ëmmer vill Leit dëse Statut zu Lëtzebuerg ufroen. An deenen 3 éischte Méint hunn 682 Leit eng Demande zu Lëtzebuerg gemaach. Dorënner si wuel 132 aus Syrien, awer och z.B. 96 Leit aus Serbien, 69 aus Marokko, 56 aus Algerien an 42 aus Albanien. Bei den Demandeuren aus Marokko an Algerien hu schonns ronn 90% den Asyl an engem aneren europäeschem Land ugefrot!
An enger parlamentarescher Fro geet den ADR-Deputéierte Fernand Kartheiser op eng ganz Rei Aspekter vun dëser Migratioun an, z.B. um Plang vu medezineschen Tester, d‘längt vun de Prozeduren, der Integratiounsfäegkeet an Initiativen op europäeschem Niveau Initiativen huelen, fir d’Réckféierung vu Leit, déi schonns virdrun an engem anere Lande Asyl ugefrot hunn.

De Roy Reding hat eng “Question élargie” gestallt. Dat si parlamentaresch Froen, déi den zoustännege Minister muss virun der Chamber beäntwerten. Dem ADR-Deputéierte säin Uleies war duebel. Hien ass fir eng Regelung vun den Affekotenhonorären a fir e bessere System, datt déi Partei, déi viru Geriicht gewënnt, hir Affekotenfraisen ersat kritt. Deen aktuelle System, wou e Riichter no eegenem Ermiessen eng Indemnitéit ka festleeën, gëtt dem Roy Reding keng Satisfaktioun. Mä de Justizminister Felix Braz gesäit, trotz den Argumenter vum Roy Reding, keen Handlungsbedarf.

D’ADR huet hiren Accord ginn fir e Gesetz, wat den Online-Verkaf vu Medikamenter regelt. De Roy Reding huet allerdéngs drop opmierksam gemaach, datt och Medikamenter, déi een ouni Rezept ze kafe kritt, kënne geféierlech sinn.

De Fernand Kartheiser huet de 27. Abrëll an der Chamber eng Brandried gehalen. Wat him guer net gepasst huet war ee vun de leschte Sätz an der Ried zur Lag vun der Natioun an d’Behaaptung, d’Regierung géing keng ideologesch Politik maachen. An dee Saz huet hien a senger Ried auserneegeholl a widderluecht.

Ugefaang huet hie mam Geschichtsversteesdemech vun der Regierung, déi historesch wichteg Evenementer scho bal ënnert den Teppech kiert an iwwerhaapt e gestéiert Verhältnis zum Land hätt. Gambia hätt e stéiert Verhältnis zum Land, seet den ADR-Deputéierten. Si géing regelrecht Krich féieren géint d’Kierch, géint d’Traditiounen a géint d’Famill. Am Zesummenhang mat Leihmutterschaft a GPA huet hien d’aktuell Regierung mam Dr Frankenstein verglach, well si och Technologien erlaabt, déi si net beherrsche kann. An der Schoul géing si kapituléiere virun der gesellschaftlecher Situatioun a weder op eng Integratioun vun de Schüler nach op d’Qualitéit vum Unterricht setzen. Esou grouss wéi de Bildungsmisär wär just nach d’Mësstrauen, dat si den Eltere géing entgéintbréengen.

Firwat d‘ADR de PAG vun der Stad Lëtzebuerg net matstëmmt

D‘Marceline Goergen, Gemengeconseillère fir d‘ADR, kann deen erneierte PAG vun der Stad Lëtzebuerg beim 2. Vote net ënnerstëtzen. D‘ADR erkennt déi ganz vill Aarbecht vun de Gemengeservicer an externe Berodungsbüroen un. Si seet och deene ville Bierger Merci, déi sech de PAG genee ugekuckt hunn, an hir Suergen an iwwer 800 Reklamatiounen ausgedréckt hunn. Leider huet et u politeschem Wëlle gefeelt, fir aus dem PAG en effektive Plang ze maachen, e Plang deen an d‘Zukunft weist, an awer och e Plang op deem ee sech liicht erëm fënnt.

De PAG ass keen Zukunftsplang, well en net fest leet wéi vill Awunner, wéi vill a wéi eng Wunnenge sollen entstoen, wéi vill Aarbechtsplazen d‘Stad kann ophuelen, wéi a wou de Verkéier soll lafen. Dës Bedenken, déi d‘ADR schonns beim éischte Vote ausgedréckt huet, si voll a ganz vun der Commission d‘Aménagement bestätegt ginn, ouni datt de Schäfferot dorops eng konkret Äntwert ginn huet.

De PAG ass eng Landkaart, op der nëmme Spezialiste sech erëm fannen, mat ville Faarwen, Superpositiounen, gestrichels a gepinktels. Och d‘Partie écrite bitt vill Spillraum, un der d‘Affekote vill Freed wäerten hunn.

D‘ADR bedauert besonnesch, datt de Remarken a Suggestioune vum Sites et Monuments nëmme ganz wéineg Rechnung gedroen ginn ass, an datt ganz vill Objeten – wéi z.B. Synagoge – net geschützt gi sinn. Et ass och net an der Rei, datt de PAG gestëmmt gëtt, obschonns eng Rei Ëmweltetüden, déi fir de Plang néideg sinn, nach net ofgeschloss sinn.

De PAG, kaum gestëmmt, wäert schonns mussen a Prozedure goe fir dësen nees ze änneren. E konkret Beispill ass hei d‘Arelerstrooss, wou gewosst ass, datt de Stadion an d’Pompjeeskasär verschwannen. Et si keng nei Zonen ausgewise gi fir Schoulen, Altersheemer an aner ëffentlech Gebaier. Parke ginn net als Park ausgewisen, Parkplazen net als Parkplazen, et feelt e gesamte Verkéierskonzept, an esou weider.

Trotz der viller Aarbecht, an der absoluter Noutwennegkeet fir en Zukunftsplang fir d‘Stad opzestellen, deen dësen Numm och verdéngt, kann d‘Marceline Goergen fir d‘ADR dem PAG wéi e vun der Majoritéit virgeluecht ginn, ass net zoustëmmen.

Pressematdeelung vum 28. Abrëll 2016 – ADR Sektioun Stad

An der Debatt iwwer d’Lag vun der Natioun huet de Roy Reding, de 27. Abrëll, e wichtegen Akzent gesat: Liewensqualitéit a Wuelfillen fënnt een net an engem Land, wou ee sech keng Wunneng leeschte kann. Duerno huet den ADR-Deputéierte sech méi genee mat de wéineg demokratesche Virstellungen vun de Regierungsparteien befaasst … natierlech net, ouni datt alt nees Ministeren him ongehuewelt an d’Wuert gefall sinn. D’Manéiere op der Regierungsbenk ware scho besser.

De Roy Reding huet sech fir privat Eegentum am allgemengen agesat a fir private soziale Wunnengsbau am besonneschen. Dat fir sech ze wieren géint déi sëllechen an onwierksam staatlech Agrëff an de Wunnengsbau, déi bestinn oder ugeduecht sinn: Emphyteos, Enteegnung, festgesate Loyers- an Terrainspräisser, Festleeung vum Wunnraum pro Persoun … Seng Alternativen si méi Transparenz um Marché, ëffentlechen Zougang zu de Präisser a Sammlung vun den Donnéeë fir kënnen ze vergläichen. All Kontroll dreiwt d’Präisser an d’Luucht, sot de Roy Reding mat Bléck op Gambia hir Reglementéierungswut.

Den éischten Dee vum ADR-Deputéierte senger Ried war en Tribut un d’onendlech Phantasie vun dëser Regierung, fir Kontrollen a Schikanen fir Leit ze erfannen, déi selbstänneg sinn oder et wëlle ginn.

E “Kloertext” Spezial iwwer d’Debatt zur Lag vun der Natioun huet de jonke Politiker d’Wuert ginn. Dobäi war den Toun liicht méi kritesch wéi a groussen Deeler vun der Chamber, awer d’Oppositioun an d’Koalitioun waren och hei kloer getrennt. Och déi jonk Gambia-Politiker droen de Wuesstems- a Scholdekurs vun der Regierung mat. Fir d’ADRenalin, déi jonk ADR, war de Felix Reding mat um Fernsehplateau. Dat war vun der Kloertext-Ekipp fir d’éischt net esou geplangt.

Eis Partei huet misse géint d’ursprénglech Pläng vun RTL per Bréif protestéieren, fir datt och d’ADRenalin   invitéiert ginn ass. RTL huet d’Emissioun dorops verlängert an en ADRenalin-Member invitéiert. RTL huet d’Emissioun och ëm en Dag verréckelt, mä dat war och enger Micros-Pann an der Chamber geschellt. D’Diskussioun hätt sollten tëscht deene 5 anere Chambersparteien gemaach ginn. Mä de Felix Reding huet e puer Punkten op e puer “i”-e gesat, déi d’Diskussioun wierklech weiderbruecht hunn. Seng Interventiounen am éischten Video am RTL-Link ware bei 5’48”, 11’04”, 15’05” a 17’45”, am zweeten Video op 1’46”, 8’19”, 13’00” an am drëtten Video op 6’30”, 8’45”, 14’00”.

 

D’Debatten iwwer d’Erklärung vum Premierminister, de 26. a 27. Abrëll an der Chamber, weisen däitlech déi ënnerschiddlech Optiken: D’Regierung feiert hire Rekordwuesstem an hire Rekorddefizit, awer de Gast Gibéryen pickt do, wou et wéi deet. De Wuesstem bréngt dem Land ëmmer méi ongeléiste Problemer. D’Regierung mécht Schold, déi si net zeréckbezilt, an dat trotz hirem Spuerpak, dee ville Leit richteg wéi gedoen huet, trotz der Erhéigung vun der TVA, déi Milliarden an d’Staatskees spullt an trotz där gudder Wirtschaftslag.

An esou huet de Gast Gibéryen d’Finanzlag analyséiert, op déi d’Regierung esou houfreg, ass awer iwwer déi si nëmmen d’hallef Wourecht seet. Hien huet den Aarbechtsmaart gekuckt, wou esou vill Plaze geschaf ginn, awer de Chômage net erofgeet. Hien huet kritiséiert, datt ëmmer méi Lëtzebuerger an d’Grenzregioun musse wunne goen an datt de Rekordwuesstem virun allem och dee vun de Wunnengspräisser ass. Liewensqualitéit a Wuesstem ass awer eng Debatt, déi nëmme ka gefouert ginn, wann d’Regierung hire rosa Brëll vun der Nues hëlt. De Gast Gibéryen huet dat gemaach an engem eeschten, soberen Toun, well de Sujet fir méi eng sprëtzeg Approch vill ze eescht ass. D’Ried gouf dës Kéier vum Minister Etienne Schneider am meeschten ënnerbrach. Nëmme kee schwätzen loossen, dee weess wat am Land lass ass an deen der Regierung d’Wourecht seet, ass d’Gambia-Strategie, déi och kee Respekt virun der Chamber kennt a wou d’Gambia-Ministeren sech ofwiessele fir den Deputéierten an d’Wuert ze falen.

 

Wou Plaz ass fir fënnef, ass der och fir sechs: Dat gesäit RTL-Télé wuel net esou. Si huet de 25. Abrëll owes eng Emissioun “Kloertext” Spezial ugesat. Do diskutéiere Jonker vu fënnef Parteien iwwer d’Ried zur Lag vun der Natioun vum Premierminister Xavier Bettel (déi jo elo awer verluecht ginn ass). An der Chamber sinn allerdéngs sechs Parteie vertrueden. RTL huet awer aus onerkläerleche Grënn kee Vertrieder vun ADRenalin, der jonker ADR, an dës Emissioun invitéiert. Dobäi hëlt an der Chamber just d’ADR bei villen Themen, déi dësen Dënschdeg an der Chamber zur Sprooch komm wären, eleng d’Oppositiounsroll an. Déi fënnef Parteien, déi matenee invitéiert gi sinn, si sech an de meeschten gesellschaftspoliteschen Themen leider eens. Eng Stëmm vun der Oppositiounspartei ADR hätt do wuel gestéiert. RTl huet d’Gespréichspartner fir hir Emissioun och net no Gréisst a Wichtegkeet ausgesicht, soss wäre jo net Déi Lénk (mat engem Chamberssëtz manner wéi d’ADR) invitéiert. Wéi d’Diskriminatioun vun enger demokratesch gewielter Partei journalistesch ze vertrieden a mat den ëffentlech-rechtlechen Aufgaben ze vereinbaren ass, wäert wuel en RTL-Geheimnis bleiwen.

iwweregens net vir d’éischt, datt esou eppes grad an der Emissioun “Kloertext” geschitt. Do war och schonn emol d’Sylvie Mischel als Vertriederin vun den ADR Fraen telephonesch invitéiert fir am Public ze sëtzen, iwwerdeems um ronnen Dësch diskutéiert ginn ass.

Den tierkesche Referendum war an der Kritik, och wat d’Zuelen vun de Stëmmen ugeet, déi zu Lëtzebuerg op der tierkescher Botschaft ofgi gi sinn. Duerfir huet de Fernand Kartheiser nogefrot, ob d’tierkesch Botschaft hei am Land der Lëtzebuerger Regierung no de Regele matgedeelt hat, datt och Tierken aus de Nopeschlänner hei géingen ofstëmmen. D’Drénglechkeet vun der Fro, déi eng séier Äntwert garantéiert hätt, ass net unerkannt ginn, obwuel wéi den Bausseminister haut seet, datt d’Lëtzebuerger Regierung net informéiert war.

D’ADR huet och mat engem Pressekommunikee op dës Wale reagéiert. Eis Partei verlaangt nach eng Kéier grad no deem Resultat vum Referendum, datt d’EU-Bäitrëttsverhandlungen net nëmmen op Äis geluecht mä definitiv ofgebrach ginn. Mir wonneren eis och, datt de Lëtzebuerger Bausseminister beim tierkesche Referendum en demokrateschen Ëmgaang verlaangt, déi seng eege Regierung 2015 zu Lëtzebuerg och net un den Dag geluecht hat.

De Fernand Kartheiser huet eng parlamentaresch Fro gestallt, fir e Verglach ze kréien, wéini wéi vill Beem bei Bauaarbechten ëmgeluecht gi sinn a wéi dee Verloscht kompenséiert gouf. Hien hätt déi Opstellung gär fir déi zwou lescht Legislaturperioden. Am nämmlechte Kontext huet den ADR-Deputéierten nogefrot, wéi a wou Fiichtgebidder, déi ewech gemaach ginn, kompenséiert gi sinn.

 

Op Ouschtersamschdeg huet eng Equipe vun der ADR Sektioun Stad um Maart Rout-Wäiss-Blo Eeër verdeelt. D’Aktioun hat wéi ëmmer e grousse Succès, an huet och eng Réi flott Kontakter mat den Awunner erlaabt. Iwwert dëse Wee wënscht d’Sektioun Iech all schéin Ouschterdeeg.

D’ADR wënscht hire Memberen a Frënn frou a schéin Ouschteren. Dir fannt eis haut Samschdeg, de 15. Abrëll, um Stadter Maart an e Méindeg, de 17. Abrëll zu Nouspelt op der Emaischen.

tulpefeld_ouschteren_2

De Fernand Kartheiser huet eng parlamentaresch Fro gestallt iwwer d’Situatioun a Gemengen, wou Container fir Flüchtlinge sollen opgestallt. Haaptsächlech geet ët him ëm déi ongeklärte rechtlech Froen zu Stengefort. Mä och iwwer d’Entwécklung zu Mamer an zu Jonglënster wollt de Fernand Kartheiser Renseignementer. Liest hei déi parlamentaresch Fro vum Fernand Kartheiser an déi gemeinsam Äntwert vum Här Minister fir nohalteg Entwécklung an Infrastruktur, der Madame Familljen- an Integratiounsministerin an dem Här Migratiounsminister.

 

 

 

De Fernand Kartheiser wëll d’Regierung am Hierscht interpelléieren iwwer d’Meenungsfräiheet. Eng ganz Rei vu senge parlamentaresche Froen hu jo drëm gedréit, erauszefannen, wéi eis Justiz mam Phänomen “Hate Speech” besonnesch op de soziale Medien ëmgeet. An der Lescht heefe sech Verurteelungen wéinst Aussoen, déi op Facebook gemaach ginn. D’Interpellatioun wäert ënner anerem prinzipiell Iwwerleeungen zum Risiko vun enger Zensur (déi an der Verfassung ofgeschaft ass) an zu rezente legislativen a jurisprudentiellen Entwécklungen zu Lëtzebuerg erlaben.

Grad Kanner kënne schwiereg Patiente sinn, a Waardezäiten an den Urgence verquësse si dann och net gutt. De Steve Colin verlaangt an der Petitioun 778, datt d’Waardezäiten an der Kannerklinik bei den Urgence méi kuerz musse ginn. Als Papp vun zwee Kanner, weess hien, vu wat hie schwätzt. Nieft der Waarderei stéiert hien awer och, datt anscheinend an der Klinik kaum Prioritéite gesat ginn, wat den Eescht vun der Erkrankung ugeet an datt de Wartesall och alt ze kleng ass fir déi vill jonk Patienten. Mat senger Fra Rosemarie probéiert hien, säin Uleies däitlech ze maachen, an hien huet och eng Entrevue bei eiser Partei kritt, fir seng Doleance virzebréngen. Empfaang goufen de Steve an d’Rosemarie Colin vum Kelly Meris (2. v. l. op der Photo)  an dem Fernand Kartheiser.

D’offiziell Visite vum portugisesche Premierminister António Costa zu Lëtzebuerg war d’Geleeënheet fir bilateral Ofkommes an e “Mémoire d’entente” ze ënnerschreiwen. Konkret ass just iwwer e Kommunikee vum Schoulministär eppes gewosst, wat an deenen Dokumenter steet. De Fernand Kartheiser huet elo an enger parlamentarescher Fro d’Regierung opgefuerdert, der Chamber dës Texter zoukommen ze loossen. Hie freet och, ob d’Regierung denkt, dës Texter vun der Chamber ratifizéieren ze loossen, wéi d’Verfassung et verlaangt. Déi zoustänneg Ministeren hun an enger gemeinsamer Äntwert dorop higewisen, datt si, no hirer Interpretatioun, net verflicht wieren, déi Texter vun der Chamber ratifizéieren ze loossen. Si wieren awer bereet, déi Texter, jeeweils deenen zoustännege Kommissiounen ze presentéieren.

Et ass gelungen: D’Lëtzebuerger Press feiert elo jorelaang e franséische Whistleblower, dee LuxLeaks an d’Rulle bruecht huet. Zënter kuerzem mécht si awer mat groussem Äifer mat Juegd op Lëtzebuerger Whistleblower, déi Informatiounen aus dem Geheimdéngscht viru ginn hunn, a probéiert niewebäi, och dem Gast Gibéryen ze schueden. Fir bal eis ganz Press ginn et deemno gutt Whistleblower a schlecht Whistleblower. Dat ass eng gelunge Perspektiv a gelungene Journalismus.

Dat geet esou wäit, datt  et an der aktueller Geheimdéngscht-Affär op eemol anscheinend méi wichteg ass, d’Fuite beim SRE ze fannen, wéi opzedecken, wéi et zu der illegaler Ecoute komm ass a firwat déi Leit, déi verflicht waren, dës Illegalitéit beim Parquet  ze mellen, dat net gemaach hunn. An datt dobäi och heindsdo Tatsaache verdréit ginn, wéi am Titel aus dem Wort, dee mir hei uewen ofdrécken. Zur Richtegstellung: Weder war de Gast Gibéryen an Erklärungsnout, nach war hien opgefuerdert, bei der parlamentarescher Kontrollkommissioun “virstelleg ze ginn”, wéi et och am Text steet. A Wierklechkett war hien invitéiert op e Meenungsaustausch, deen och nëmmen 10 Minutte gedauert huet. D’Wort schreift dat also  falsch, fir dem Gast Gibéryen seng Roll onbegrënnt an de Virdergronn ze bréngen.

E puer Dokumenter zu dësem Sujet:

Néng Leit waren an der Promotioun 27 fir Brigadier bei der Police ze ginn. Si sinn den 13. Dezember 2016 vereedegt ginn, haten awer virdru mussen hiren Aarbechtsvertrag verlängeren, well anscheinend an der Verwaltung eppes schif gaang war. De Fernand Kartheiser freet an enger parlamentarescher Fro ënnert anerem, ob derfir gesuergt ass, datt deene Leit wéinst dëser Verspéidung kee Schued an der Karriär entsteet.

Et ass net fir nach eng Kéier opzerullen, wat alles geschriwwe ginn ass, iwwer d’Informatiounsversammlung iwwert de Flüchtlingsfoyer an der fréierer EDIFF-Schoul zu Monnerech, e Méindeg an der Lallenger Sportshal. Eischter objektiv war d’Reportage vum 100Komma7, wou och de Vizepresident vun der ADR-Sektioun Esch, Louis Cimolino, zu Wuert koum. Iwwerhaapt war den Toun vun der Versammlung kee vu Friemenhaass a Gepöbels, och wann déi Escher Leit de Ministere Corinne Cahen an Dan Kersch hier Wourechten zimlech vun der Long op d’Zong presentéiert hunn.

Dem Louis Cimolino seng Ausso iwwer d’Sproochcouren, déi d’Regierung wëll obligatoresch maachen, geet bei 3’12” un. “Firwat net direkt esou?”, freet den ADR-Mann.

Vill Kommunikatioun tëscht Staat a Bierger leeft, ëmmer méi, iwwer den Internet. Kierzlech waren awer eng ganz Rëtsch Staats- a Regierungssiten wéinst enger Cyber-Attack net ze erreechen. Wat do lass war, wollt de Fernand Kartheiser an enger parlamentarescher Fro wëssen. D’Äntwert op dës Fro war awer esou wéineg zefriddestellend, datt de Fernand Kartheiser den Här Chamberspresident gefrot huet, fir d’Fro nach eng Kéier ze stellen, wat den Deputéierten och accordéiert kritt huet.

D‘Zukunft vum Musée vun der groussherzoglecher Police ass ongewëss. Dëse Musée huet de Merite, wann och mat ganze bescheidene Mëttelen déi reng op de Benevolat opgebaut sinn, der „Fliicht zur Erënnerung“ (devoir de mémoire) nozekommen, dëst fir ee vun der ganz wichtege Corpse fir eist Land.
Nieft den Erënnerungsstécker déi am Musée ausgestallt sinn, wéi Uniformen an Interventiounsween, geet et an dem Musée och drëms, d‘Geschicht vun der Police an der Gendarmerie waakreg ze halen.

Donieft kéint de Musée vun der groussherzoglecher Police eng Attraktioun fir Touriste sinn, d‘Evolutioun vun den Techniken an der Investigatioun opweisen, Schoulklassen empfänken an esou och de Beruff vum Polizist opwäerten.

Och d‘Gebai selwer – wat sécherlech sanéiert misst ginn – ass e wichtegen Zeie vun Industriegebaier aus der Mëtt vum 20. Joerhonnert, esouwuel wat d‘Architektur selwer betrëfft wéi och Lifter, Fossen a Kranen.Dowéinst huet den ADR-Deputéierte Fernand Kartheiser eng erweidert parlamentaresch Fro gestallt, déi mëndlech muss an der Chamber beäntwert ginn.

(Photo: Camille Diener)

D‘Problemer ronderëm de Militärfliger A400M sinn nach ëmmer net geléist. Dëse sollt, no verschiddenen Äntwerten op parlamentaresch Froen, „fréistens 2017“ oder am Februar 2019 geliwwert ginn. 2019 bleiwt elo den Termäin, äntwert de Minister, dee soss awer net vill Präzisioune gëtt.

En Donneschdeg, den 30. Mäerz war en Treffen zu Madrid tëschent dem Fabrikant a Vertrieder vu Regierungen, déi den A400M bestallt hunn. Airbus soll dobäi gefrot hunn, fir déi „hefteg Penalitéiten“, déi d‘Firma wéinst de Verspéidungen an aner Problemer misst bezuelen, erof ze sëtzen. An dësem Kontext huet den ADR-Deputéierte Fernand Kartheiser eng Rei Froe gestallt, ënner anerem: gëtt Lëtzebuerg fir d‘Verspéidung bei der Liwwerung entschiedegt? Wa jo, wéi héich ass dës Zomm an Euro an a Prozenter zum Präis vum Fliger?

D‘Regierung huet de „gemeinsame Fleegedossier“, no der franséischer Ofkierzung och nach DSP (Dossier de Soins Partgagés) genannt, agefouert. Dës Dossiere gi vun der Agence eSanté, engem Groupement fir ekonomesch Interessien (G.I.E.) verwalt.

Am Abléck ginn d‘Leit mat Bréiwer doriwwer informéiert, datt eng Pilotphase gestart ginn ass, an datt hir gemeinsam Fleegedossieren accessibel sinn. Dëse Bréif, deen och un eeler Assurée geschéckt gëtt, ass awer exklusiv op Franséisch verfaasst.

Iwwert de Wee vun enger parlamentarescher Fro huet den ADR-Deputéierte Gast Gibéryen drop bestanen, datt d‘Assuréen an hirer Sprooch, dat heescht och op Lëtzebuergesch, informéiert ginn.

Datt administrativ Ännerungen näischt un der Wunnengsnout änneren, huet net nëmmen de Roy Reding erkannt. Datt sech heemlech en neie Renteklau undeit, huet hein den 23. Mäerz an der Chamber awer zu Recht erfirgehuewen an direkt d’Oppositioun vun der ADR zu esou Pläng ugekënnegt. D’Rentekeess ass do fir d’Renten an net fir Wunnengen ze bauen! Pertinent ass dogéint dem Roy Reding seng Fro no de Waardelëschten bei Sozialwunnengen. De Minister Marc Hansen ass net vill an d’Detailler gaang, mä huet awer zouginn, datt eng 2.200 Leit hei am Land am Ament op eng Wunneng waarden.

De Roy Reding huet an der Chamber, den 23. Mäerz,  nach eemol Stellung zum Tram geholl. D’ADR war ëmmer géint dee Bing-Projet, dee méi wéi eng Milliard Euro kascht, a keng Verkéiersproblemer wäert léisen. Hei als klenge Rappel, e Flyer vun eiser Partei iwwer de City-Tunnel.

De Roy Reding huet erkläert, datt de Schantgen vum Tram bis no de Gemengewalen net vill Leit géing betreffen, awer datt d’Problemer um Kierchbierg a ronderëm elo scho ganz reell wären. Hien huet nach eemol rappeléiert, datt de City-Tunnel (Zuchsgleiser ënnert der Stad) déi besser Solutioun gewiescht wären, grad och well dee Schantgen net mattsen an der Stad gewiescht wär. Well elo scho Leit dervu fuebelen, den Tram bis op eis Grenze vum Land auszebauen, huet den ADR-Deputéierte gemengt, dat wäre genee déi Zuchsverbindungen, déi de City-Tunnel direkt erméiglecht hätt. Schwätze konnt den ADR-Deputéierte nëmmen, nodeems de Chamberspresident d’Majoritéit gebieden hat, sech esou ze behuelen, wéi Deputéierte sech an enger Demokratie behuele missten … ouni vum Chamberspresident drun erënnert ze ginn.

D’Regierung an d’CSV, déi dat alles brav matstëmmt, soen eppes a maachen de Konträr. Dat ass net nei. De leschte Fall war den 23. Mäerz an der Chamber, bei engem Gesetz iwwer d’Gemengebeamten. D’ADR huet d”Gesetz matgestëmmt, mä de Gast Gibéryen huet sech un engem Artikel gestéiert. Et soll Gemengen erlaabt sinn, Leit anzestellen, déi nëmmen eng vun eise Verwaltungssprooche schwätzen, also net Lëtzebuergesch. De Gast Gibéryen freet, fir wat fir spezialiséiert Aufgaben ee kee Gemengebeamte géing fannen, dee Lëtzebuergesch kann. Hien erënnert och un de Fall LuxTram, wou Franséisch einfach zur operationeller Sprooch deklaréiert gëtt, mat där eleng den Tram kéint rullen. An hie reegt sech op iwwer déi schäinhelleg Wierder mat deenen d’Regierung an d’CSV eis Sprooch verdeedegen … awer a Wierklechkeet de Konträr maachen. Dee Gesetzesartikel ass a sengen Aen en Deel vum systematesche Versuch, an der Lëtzebuerger Verwaltung d’Lëtzebuerger Sprooch auszeklénken.

De Roy Reding huet d’Chamber an d’Regierung den 23. Mäerz zweemol erféiert, wéi doriwwer geschwat ginn ass, ob den Defizit vum RTL-Fernseh soll vum Steierzueler iwwerholl ginn. Hien huet verlaangt, datt keng aktiv Politiker am RTL-Verwaltungsrot solle sëtzen an den dräi Fraktiounscheffen vun DP, LSAP an CSV hir Demissioun aus dem gutt bezuelte Gremium nogeluecht. An hien huet drop gehalen, datt de Concessiounsvertrag der Chamber soll virgeluecht ginn, well d’Deputéierten nëmmen déi nei Deeler géinge kennen fir ze diskutéieren, an net de ganzen Text. Den ADR-Deputéierten huet och zwou Motiounen an deem Sënn abruecht, eemol fir den integralen Text vum Konzessiounsvertrag vun 2007 virgeluecht  ze kréien an eemol fir déi deontologesch quantitativ a qualitativ Verflichtungen vun RTL Télé  duerch d’Chamber kontrolééieren ze loossen.

Nom CSV-Staat den RTL-Staat?

Déi dräi Fraktiounscheffen vun DP, LSAP an CSV kommandéieren 48 Stëmme vu 60 an der Chamber, huet den Roy Reding erkläert a gefrot, ob d’Land nom sougenannten CSV-Staat elo en RTL-Staat wär. D’Subventionéierung vun RTL-Fernseh am Numm vu Pressepluralismus a Meenungsfräiheet huet hie verglach mat anere Beräicher, déi net däerfe subventionéiert ginn. Hien huet do besonnesch de Fonds de Logement genannt, deen an Zukunft muss Steiere bezuelen, a mam Findel, deen och net däerf subventionéiert ginn. De Roy Reding huet och déi grouss Avantagen ugeschwat, déi RTL vum Lëtzebuerger Staat gemaach kritt huet, an dat mat der Arbed verglach. A béide Fäll hätte grouss Lëtzebuerger Betriber vun Avantage profitéiert, déi de Steierzueler bezuelt huet, ier si vu grousse multinationale Betriber, Mittal oder Bertelsmann, opkaf gi sinn.

Hien huet verlaangt, datt am Fall vun enger Subventionéierung vun RTL-Télé, d’ëffentlech-rechtlech Missioun vum Sender misst wierklech eescht geholl ginn an ënnert anerem e Kannerprogramm an eng fair a pluralistesch Behandlung vun alle Parteien esouwuel an der Berichterstattung wéi och, wat hir Presenz op den Antenn ugeet, verlaangt.